طب هانعمل ايه يوم 4 مايو؟؟

انا متفائل جدا النهار ده لان نسبة نجاح الاضراب غدا نقلا من تقرير وزارة الداخلية تزيد عن 70%
و انا قررت اطلع شوية نقط فيها تلخيص للهنعملو بكرة كلنا
يعني ده رسالة ببعتها لكل شعب مصر علشان نفوت الفرصة علي الدخلية و كلاب الدخلية و حسني مبارك مع الحفاظ علي الالقاب انا الدكتور و انتا الرئيس

طب هانعمل ايه يوم 4 مايو؟؟
كل واحد يعمل اللى يقدر عليه من الإختيارات التاليه

1- الاجماع على ارتداء ملابس سوداء . و لو مش عارف يبقى اى حاجه سوده .. و خلاص .. شريط .. شاره .. بندانا

2- تم الاتفاق على ان يحاول الجميع قدر استطاعته بكل السبل البقاء فى المنزل فى يوم الإضراب مع تعليق لافته على باب منزله بمطالبنا المشروعه

3- الاجماع على تعليق علم مصر فى البلكونات و رايات سوداء و اى لوحات او لافتات تتضمن مطالبنا البسيطه

4- للطلاب و الاطباء و المهن الحرجه التى قد تضره دعوة البقاء فى البيت ... يمكنك أن تذهب لعملك او جامعتك او مدرستك عادى جدا مع الحرص على ارتداء اى شىء اسود او شاره سوده و ياريت تعرف تكتب بأى طريقه مطالبنا على اللبس او الشاره اللى هاتعلقها على شنطتك او دراعك ..و يستحسن تعرف تتجمع مع الناس جوه جامعتك او شغلك و تعلنوا الاعتصام الرمزى لبعض الوقت إعتراضا على الاحوال السيئه التى تمر بها مصر مع اعلان مطالبنا بوضوح

5- مقاطعة شراء اى سلع فى اليوم ده تحديدا .. و مقاطعة اللحوم و الفارخ لمدة 3 ايام هى 4 و 5 و 6 مايو .. و ماتخافوش ..محدش هايموت

6- مقاطعة الجرائد الحكوميه المضلله و الكاذبه زى الاهرام و الاخبار و الجمهوريه و روز اليوسف ... و كذلك مقاطعة الفضائيات الغير محايده و التى تستجيب للضغوط و تذيع النشرات و الاخبار القادمه من أمن الدوله و خاصة برامج 90 دقيقه و القاهره اليوم

7- نظرا لإستخدام حكومة الحزب الوطنى لقانون التجمهر الذى تم اصداره عام 1914 و الذى يجرم اى تجمع 5 افراد " فى الشارع "بدون اذن مسبق .. فإننا نطالب جميع اعضاء الجروب و المتعاطفين بالوقوف أمام منازلهم لكل أو لبعض الوقت يوم 4 مايو المقبل مرتدين السواد و حاملين للافتات بها مطالبنا مع فتح حوارات نقاشيه مع الماره و الجيران و إن لم تستطع فممكن تقف فى البلكونه مع نشر حاجه سوده و كتابة مطالبنا و إن لم تستطع فممكن تقف على سطح البيت .. .. اتصرف
ملحوظه - هذه النقطه قابله للتعديل يا ريت تراجع تانى قبل يوم 4 مايو

على جميع الاعضاء و المتعاطفين استعادة حماس و مجهود ما قبل 6 ابريل و العمل الجاد منذ اليوم حتى يوم الاضراب القادم على نشر كل تلك الافكار بين الشعب المصرى و هم اهلنا و اصحابنا و اقاربنا و زملائنا فى العمل مستخدمين فى ذلك كل الوسائل المشروعه من دعوات صريحه عامه او فرديه او ارسال رسائل محمول لقوائمنا على التليفون او إرسال رسائل للشريط المتحرك فى الفضائيات بجميع انواعها او مكالمات هاتفيه او البريد الالكترونى لكل القوائم و المجموعات البريديه و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق الالافتات و ارتداء تى شيرت أو شاره يحمل الدعوه للإحتجاج السلمى من الان حتى ميعاد 4 مايو بجانب لصق دعوات الاحتجاج السلمى فى الشوارع و امام المساجد و داخل الجامعات و توزيع البيانات فى الشوارع و استخدام كل الوسائل المتاحه منها فكرة الاسبراى و استامبات الخشب و... و... و....
و على طلاب الجامعه نشر كل تلك الافكار بين اصدقائهم و زملائهم و محاولة النشر بكل الوسائل السلميه شارحين اهمية اليوم و كيف انه الخطوه الثانيه و موضحين مكاسب 6 ابريل
مهمتنا هى النشر فى الشارع و نقل ثقافة الايجابيه لرجل الشارع البسيط
الناس اللى ماعندهمش نت ولا عندهم وصلة دش .. ولا بيقروا جرايد من الاساس

و على المصريين المقيمين بالخارج التحضير لوقفات إحتجاجيه صامته امام مقرات السفاره المصريه .. بجد هاتفرق معانا كتير

ندعوا جموع المهندسين المظلومين لترتيب وقفه احتجاجيه يوم 4 مايو بالمقر الرئيسى للنقابه للمطالبه بفك الحراسه عن النقابه و اجراء انتخابات
و كذلك ندعوا الاطباء لتنظيم وقفه احتجاجيه يوم 4 مايو للمطالبه بكادر خاص
و ندعوا الصحفيين لتنظيم وقفه احتجاجيه اعتراضا على محاكمة الصحفيين و رؤساء التحرير و اغلاق بعض الصحف
و نوجه الدعوه لاى عمال يعانون من مشكلات مع ادارة المصنع ..للقيام بوقفه احتجاجيه لمدة نصف ساعه للمطالبه بحقوقهم
بس كل واحد فى مكانه
لا تجمهر ولا تعطيل مرور ولا شغب

دونت بواسطة معاذ عبد الكريم